MARIA Medicea

MARIA Medicea

Galliae Regina. Filia Francisci, Magnae Florentiae Ducis ex Iohanna Austriaca, natâ Hungariae et Bohemiae reginâ, nupsit Henrico M. postquam coniugium eius cum Margarita Valesia dissiliisset. A. C. 1600. Ex illo mater Ludovici XIII. etc. A. C. 1610. a marito, qui ad ingens aliquod opus accinctus expeditionem extra regnum parabat, Galliae Regens declarata, illô postridie coronationis nefarie trucidatô, rebus praefuit, usque ad A. C. 1617. quô Mareschallus Ancraeus, qui Conchinus prius dictus, Florentinus, cum Leonora Galigay uxore, malis artibus Reginae animae occupatô, eousque totam Galliam sub pedibus suis trepidare viderat, occisus est. Post quae, varie cum filio Rege collisa, Coloniae exul et inops, Obiit A. C. 1642. Thuan. Hist. l. 125. Symbolum ci, A. C. 1608. fuerat, Pavo rotans, cum lemmate: Virô partuque beata. Maritô orbatae, Pelicanus, cum verbis, Tegit virtute minores. Item avis Paradisi, tres pullos alis caelum versus subvehens, cum dicto, Meos ad Sidera tollo. In Hollandia, ubi Amstelodami magnificentissime excepta est, sub Cybeles forma repraesentata est, additô, Laeta deûm partu, etc.